Elbasani e ka nisur me fitore fazën “Final 4” të kampionatit “Abissnet Superiore”, pasi mposhti pastër 3-0 Dinamo City në stadiumin “Air Albania”. Verdheblutë zhvilluan një pjesë të parë shumë të fortë, duke vendosur praktikisht fatin e takimit që në 45 minutat e para.
Skuadra elbasanase mori kontrollin e lojës dhe përfitoi edhe nga dalja me karton të kuq e Gudiabi. Në minutën e 25-të, Tsague kaloi Elbasanin në avantazh me një goditje me kokë pas asistimit të Loukili.
Vetëm pak minuta më vonë, i njëjti lojtar shfrytëzoi një pasiguri në prapavijën e Dinamo City dhe realizoi golin e dytë personal, duke i dhënë qetësi të madhe skuadrës së tij.
Elbasani nuk u ndal me kaq. Në minutën e 38-të, Diallo shënoi golin e tretë dhe vulosi një pjesë të parë perfekte për verdheblutë.
Në fraksionin e dytë, ritmi ra ndjeshëm, me Elbasanin që menaxhoi avantazhin dhe nuk lejoi rikthimin e Dinamo City në lojë. Rezultati mbeti i pandryshuar deri në fund, duke i dhënë skuadrës elbasanase një fitore të rëndësishme.
Me këtë sukses, Elbasani shkon në kuotën e 34 pikëve, po aq sa Egnatia kryesuese. Vllaznia ndjek me 31 pikë, ndërsa Dinamo City mbetet në vendin e katërt me 27 pikë, në një garë që premton shumë emocione në fazën “Final 4”.
