Organizatorët e Lojërave Olimpike Dimërore “Milano-Cortina 2026” kanë shprehur shqetësim serioz mbi cilësinë e medaljeve pas ankesave nga disa atletë fitues, që raportuan për dëmtime të menjëhershme pas marrjes së çmimeve. Dy atletet amerikane, Breezy Johnson dhe Alysa Liu, përjetuan probleme me medaljet e tyre. Johnson, fituese e medaljes së artë në ski alpine, tregoi medaljen e saj të thyer në një konferencë për media, duke theksuar se shiriti ishte shkëputur. Ndërkohë, Liu, që mori medaljen e artë në patinazhin artistik, postoi një video ku tregon medaljen dhe shiriti të ndara me komentin: “Medalja ime nuk ka nevojë për shirit”.
Një incident i ngjashëm ka ndodhur edhe me ekipin gjerman që fitoi medaljen e bronztë në biatlon, ku një video tregon se medalja bie gjatë festimeve në hotel. Andrea Francisi, drejtori i operacioneve në “Milano-Cortina 2026”, njoftoi se janë të vetëdijshëm për këtë situatë dhe po hetojnë problemin për të siguruar një zgjidhje. Ai theksoi rëndësinë e medaljeve për atletët, duke u angazhuar për të kushtuar vëmendje maksimale kësaj çështjeje.
Një zëdhënës i Komitetit Olimpik dhe Paralimpik të SHBA-së tha se po presin që organizatorët të intervenojnë, por ende nuk është konfirmuar nëse atletët do të marrin medalje zëvendësuese. Ky incident nuk është i pari për Lojërat Olimpike, pasi që nga shkurti 2025 janë raportuar 220 kërkesa për zëvendësim të medaljeve të lojërave të Paris 2024 për shkak të dëmtimeve, që përbëjnë rreth 4% të totalit. Yasmin Harper, një zhytëse britanike që fitoi medaljen e parë për ekipin e saj në Paris 2024, gjithashtu vuri re se medalja e saj po tregon shenja zbehjeje. Organizatorët e Paris 2024 kanë konfirmuar që çdo medalje e dëmtuar do të zëvendësohet, duke theksuar rëndësinë e cilësisë dhe të besueshmërisë në këtë event të rëndësishëm.
