FIFA ka përgatitur një paketë të re ndryshimesh, këtë herë për rregullat që lidhen me kontratat mes klubeve dhe futbollistëve.
Sipas José Félix Díaz, klubet do të jenë të detyruara të përfshijnë në çdo kontratë një klauzolë largimi. Kjo do të thotë se lojtari dhe klubi duhet të bien dakord që në momentin e firmës për një shumë fikse, me të cilën futbollisti mund të largohet në të ardhmen.
Ky rregull ekziston prej kohësh në Spanjë, ku çdo lojtar ka një klauzolë të përcaktuar në kontratë. Tani FIFA synon ta shtrijë këtë sistem edhe në kampionatet e tjera.
Ndryshimi pritet të ndikojë ndjeshëm në merkato, pasi klubet dhe lojtarët do të kenë më shumë qartësi për çmimin e largimit, ndërsa negociatat mund të bëhen më të drejtpërdrejta.
Ndërkohë, para nisjes së Botërorit 2026, FIFA ka prezantuar edhe disa ndryshime të tjera në rregullat e lojës, me qëllim uljen e humbjes së kohës gjatë ndeshjeve.
