Spanja dhe Maroku vazhdojnë përplasjen publike për të pritur finalen e Botërorit 2030, por brenda FIFA-s skenari që shihet aktualisht si më i mundshmi është që ndeshja vendimtare të zhvillohet në “Santiago Bernabéu”.
Vendimi zyrtar pritet të merret vetëm pas një ose dy vitesh, megjithatë në Zyrih ideja mbetet që Madridi të presë finalen, ndërsa një gjysmëfinale të luhet në Casablanca dhe tjetra në Barcelonë. Spanja vazhdon të ketë peshë të madhe në futbollin ndërkombëtar, edhe pse Maroku ka avancuar ndjeshëm me investimet dhe infrastrukturën e tij.
Sipas raportimit, Real Madridi dhe presidenti i FIFA-s, Gianni Infantino, kishin prej kohësh një mirëkuptim jozyrtar që finalja të luhej në “Bernabéu”. Marrëdhëniet mes palëve janë ftohur kohët e fundit, por kjo nuk do të thotë se ky skenar është hequr nga tavolina.
Gjithsesi, FIFA ende nuk ka nisur procesin përfundimtar të përzgjedhjes së stadiumeve. Organizata do të krijojë strukturën që do të menaxhojë Botërorin, do të inspektojë stadiumet dhe qytetet pritëse dhe vetëm më pas do të vendosë përfundimisht se ku do të zhvillohet finalja.
Për momentin, gara mes Spanjës dhe Marokut vazhdon më shumë në planin politik dhe mediatik, ndërsa fjala e fundit do t’i takojë FIFA-s.
