Niveli i ujit në liqenin e Fierzës ka shënuar një tjetër rënie gjatë javës së fundit, në një periudhë kur reshjet në verilindje të vendit kanë qenë thuajse të munguara.
Kuota maksimale e liqenit shkon në rreth 296 metra, ndërsa mungesa e reshjeve gjatë korrikut dhe gushtit ka sjellë rënie të ndjeshme të prurjeve që furnizojnë rezervuarin.
Në Kukës, Drini i Bardhë, që buron në malet e Pejës, dhe Drini i Zi, që vjen nga zona e Shën Naumit, po sjellin së bashku mesatarisht më pak se 70 metra kub ujë në sekondë.
Shifra bëhet edhe më domethënëse kur krahasohet me kapacitetin e turbinave të HEC-it të Fierzës.
Secila prej katër turbinave të Fierzës mund të shkarkojë të paktën 112 metra kub ujë në sekondë. Kjo do të thotë se edhe një turbinë e vetme ka një kapacitet shkarkimi dukshëm më të lartë se sasia mesatare e ujit që po mbërrin aktualisht në liqen.
Nëse të katër turbinat vihen në punë njëkohësisht, sasia e ujit që mund të shkarkohet arrin në rreth 450 metra kub në sekondë.
Diferenca mes ujit që hyn në rezervuar dhe kapacitetit të shkarkimit tregon presionin që krijon mungesa e reshjeve mbi rezervën hidrike.
Me prurje të ulëta dhe nevojën për prodhim energjie, niveli i Fierzës mbetet një nga treguesit kryesorë të situatës hidrike në veri të vendit.
Nëse mungesa e reshjeve vijon, prurjet e pakta nga degët e Drinit mbeten një faktor i rëndësishëm për rezervën e ujit dhe për menaxhimin e prodhimit të energjisë.
