Problemet e shëndetit mendor po përbëjnë një krizë në rritje ndër fëmijët dhe adoleshentët në Europë, sipas një raporti të ri nga Organizata Botërore e Shëndetësisë (OBSH). Një në shtatë europianë nën moshën 20 vjeçare ka një çrregullim të shëndetit mendor, një rritje prej një të tretës në 15 vitet e fundit. Gjetjet tregojnë se vajzat janë më të prekuara, me një në katër vajza të moshës 15 deri në 19 vjeçare që raporton një çrregullim të tillë.
Në vitet e fundit, shqetësimet për shëndetin mendor të të rinjve janë rritur, duke identifikuar izolimin social, pandeminë COVID-19, konfliktet gjeopolitike dhe pasigurinë socioekonomike si faktorë kontribuues. Raporti vëren se adoleshentët në territoret daneze të Ishujve Faroe, si dhe në Islandë dhe Danimarkë, kanë nivelet më të mira të mirëqenies mendore, ndërsa ata në Ukrainë, Qipro dhe Poloni kanë nivelet më të ulëta.
Një problem i madh në bllok është mungesa e aksesit në mbështetje profesionale për shëndetin mendor. Rreth një e katërta e vendeve europiane nuk kanë shërbime të shëndetit mendor në komunitet për të rinjtë, ndërsa një në pesë nuk ka politika të dedikuara për shëndetin mendor. Dr. João Breda nga OBSH tha se “ky raport është një alarm”, duke theksuar se çdo fëmijë dhe të rinjtë kanë të drejtë për mbështetje dhe kujdes të cilësisë së lartë.
Ky raport është hera e parë që mbledh të dhëna gjithëpërfshirëse mbi shëndetin mendor të fëmijëve dhe të rinjve në rajonin evropian të OBSH, i cili përfshin 53 vende. Ai evidenton nevojën urgjente për kujdes adekuat në person, më çok në një kohë kur të rinjtë po mbështeten gjithnjë e më shumë në chatbot-et e inteligjencës artificiale, si ChatGPT, për mbështetje emocionale, e cila ndonjëherë rezulton në pasoja tragjike.
OBSH bëri thirrje për vendet që të ndërmarrin hapa për të përmirësuar shëndetin mendor të të rinjve, duke investuar në shërbimet e shëndetit mendor dhe duke ridizajnuar programet për të përmbushur më mirë nevojat e fëmijëve dhe të rinjve. “Duke vepruar tani, vendet mund të krijojnë sisteme të qëndrueshme që ndihmojnë brezat e ardhshëm,” tha Breda.
