Janë publikuar pamjet nga arrestimi i Aldo Avdylajt, i shpallur në kërkim më 2 tetor me urdhër të SPAK.
Arrestimi i tij u bë nga forcat RENEA në bashkëpunim me Drejtorinë e Forcës së Posaçme Operacionale në DPPSh në kuadër të operacionit “Ghost”, në banesën ku fshihej.
Gjatë ndërhyrjes në banesë, Policia gjeti dhe sekuestroi një armë zjarri pistoletë me municion luftarak.
Në kuadër të operacionit, Forcat Operacionale të DVP Durrës, në bashkëpunim me DFPO dhe Forcat Speciale “RENEA”, në afërsi të Liqenit të Thatë, kapën dhe vunë në pranga shtetasin E. A. alias Aldo Avdylaj, 37 vjeç, banues në Shijak.
Ky shtetas akuzohet nga GjKKO-ja, për veprat penale “Vrasja me paramendim”, kryer për hakmarrje, “Pastrimi i produkteve të veprës penale ose veprimtarisë kriminale”, të kryera në kuadër të grupit të strukturuar kriminal, si dhe “Mbajtja pa leje dhe prodhimi i armëve, armëve shpërthyese dhe i municionit”.
Materialet procedurale iu referuan SPAK-ut, për veprime të mëtejshme.
