Zyrtarë të lartë evropianë do të takohen për të miratuar krijimin e një organi ndërkombëtar me seli në Hagë për të vendosur mbi kompensimin që Rusia duhet të paguajë për dëmet e shkaktuara nga pushtimi i Ukrainës dhe për krimet e dyshuara të luftës.
Komisioni Ndërkombëtar i Kërkesave për Ukrainën do të shqyrtojë dhe do të vendosë mbi ofrimin e kompensimit, si dhe mbi shumën që do të paguhet. Kjo duke përfshirë të dhënat e mbledhura nga Regjistri i Dëmeve, në të cilin janë paraqitur tashmë rreth 80,000 kërkesa për kompensim nga individë, organe publike ose organizata.
Mediat e huaja shkruajnë se themelimi i kësaj organizate pritet të miratohet gjatë një konference të organizuar nga Holanda dhe që zhvillohet sot në Hagë, me pjesëmarrjen e dhjetëra zyrtarëve evropianë, përfshirë Presidentin ukrainas Volodymyr Zelensky dhe kreun e politikës së jashtme evropiane Kaia Kallas. Organizata e re do të ketë selinë në Hagë, vuri në dukje Ministri i Jashtëm holandez David van ëiel , ndërsa theksoi rëndësinë e ofrimit të kompensimit për ukrainasit.
“Pa llogaridhënie, një konflikt nuk mund të zgjidhet plotësisht . Dhe një pjesë e kësaj llogaridhënieje është pagesa e kompensimit për atë që kanë bërë. Pra, mendoj se sot po bëjmë një hap të madh duke krijuar një komision kërkesash dhe duke nënshkruar një traktat për këtë “, vuri në dukje van ëiel.
Mekanizmi i kompensimit do të koordinohet nga Këshilli i Evropës me seli në Strasburg, i cili ka 46 shtete anëtare dhe është i ngarkuar me mbrojtjen e të drejtave të njeriut në kontinent. Rusia u përjashtua prej tij në mars të vitit 2022 pas pushtimit të Ukrainës. Hapi tjetër do të ishte krijimi i një fondi kompensimi, por funksionimi i tij ende nuk është sqaruar, kryesisht sepse çështja e përdorimit të mundshëm të aseteve të ngrira ruse është në pritje.
Një plan evropian për të përdorur këto asete ka mbështetjen e shumë vendeve të BE-së , por përballet me kundërshtim të fortë nga Belgjika, ku ndodhet depozita e Euroclear. Shumica e aseteve të ngrira ruse mbahen atje, dhe Belgjika është e shqetësuar për potencialin e sfidave ligjore nëse ato përdoren.
Udhëheqësit e BE-së do ta diskutojnë çështjen në një samit që fillon të enjten. Bisedimet mbi asetet e ngrira ruse vijnë ndërsa Presidenti i SHBA-së Donald Trump thotë se një marrëveshje për t’i dhënë fund luftës në Ukrainë është më afër se kurrë. Dy ditë bisedimesh midis amerikanëve, evropianëve dhe ukrainasve në Berlin kanë parë ” përparim të vërtetë “, tha Zelensky.
“Diskutimet mbi përgjegjësinë, kompensimin dhe rindërtimin duhet të jenë pjesë e bisedimeve të paqes”, tha Sekretari i Përgjithshëm i Këshillit të Evropës, Alain Berset, pas mbërritjes së tij në samitin në Hagë
