Një ngjarje e rëndë u regjistrua pasditen e djeshme në Gjoricë të Poshtme në Bulqizë, ku një vajzë 7-vjeçe u mor nga rrjedha e lumit Drini i Zi dhe u mbyt.
Menjëherë pas njoftimit, nisën kërkimet për gjetjen e të miturës, ku u angazhuan familjarë, banorë të zonës dhe shërbimet e Policisë. Trupi i pajetë i vogëlushes është gjetur paraditen e sotme pranë urës së Drinit.
Sipas informacioneve paraprake, rritja e prurjeve në lumin Drin i Zi dyshohet se ka sjellë shtim të rrjedhës.
Po verifikohet edhe dyshimi se hapja e portave të hidrocentralit të Spilës, pas rritjes së prurjeve nga ana e Maqedonisë së Veriut, mund të ketë ndikuar në shtimin e rrjedhës së lumit.
