Policia Kufitare ndërhyri në zonën e “Kepit të Rigonit”, përballë plazhit të Llamanit, pasi u njoftua për një gomone që po lëvizte në mënyrë të pakontrolluar dhe me shpejtësi, pa persona në bord.
Nga verifikimet rezultoi se drejtuesi i mjetit lundrues, një 35-vjeçar banues në Orikum, kishte rënë në det gjatë lëvizjes dhe më pas kishte dalë në gjirin e Llamanit i dëmtuar në këmbë. Ai u transportua në spital për ndihmë mjekësore dhe ndodhet jashtë rrezikut për jetën.
Gomonia, e cila përbënte rrezik për mjetet e tjera lundruese dhe pushuesit në zonë, u vu nën kontroll nga Njësia Policore Detare dhe Policia Kufitare. Një punonjës i Njësisë Policore Detare u hodh në bord dhe arriti ta ndalonte mjetin.
Më pas, gomonia u tërhoq në Pikën e Kalimit Kufitar të Himarës për verifikime të mëtejshme.
