Manchester City ka marrë vetëm një pikë në transfertë ndaj Everton, në një ndeshje spektakolare që përfundoi 3-3 dhe pati gjithçka: gola të bukur, përmbysje, gabime të mëdha dhe një barazim dramatik në minutat shtesë.
Skuadra e Pep Guardiola e nisi më mirë takimin dhe dominoi pjesën e parë. Jeremy Doku zhbllokoi rezultatin në minutën e 42-të me një goditje fantastike, duke e dërguar topin në trekëndësh dhe duke i dhënë City avantazhin para pushimit.
Por në pjesën e dytë, Everton reagoi fuqishëm. Thierno Barry barazoi pas një gabimi të rëndë në mbrojtjen e City, ndërsa pak minuta më vonë Jake O’Brien përmbysi gjithçka me një goditje me kokë pas një goditjeje standarde. Në minutën e 80-të, Barry shënoi sërish dhe e çoi rezultatin në 3-1 për vendasit.
Manchester City nuk u dorëzua. Vetëm pak pas golit të tretë të Everton, Erling Haaland ngushtoi diferencën me një finalizim të bukur, duke rikthyer shpresat për skuadrën kampione.
Drama e madhe erdhi në minutat shtesë. Kur dukej se Everton do të merrte një fitore të madhe, Doku goditi sërish fuqishëm dhe shënoi golin e barazimit 3-3, duke shpëtuar City nga humbja.
Megjithatë, ky barazim mund të peshojë shumë në garën për titull. City humbi dy pikë të rëndësishme ndaj një Everton që luftoi deri në fund, ndërsa Arsenal përfiton në krye të Premier League.
