Detaje të reja kanë dalë në dritë lidhur me arrestimin e Edison Korrës dhe Orest Ballës në Tiranë, të dyshuar për një skemë mashtrimi ndaj biznesmenit Armando Duka.
Sipas të dhënave të bëra publike, dy të rinjtë dyshohet se i kanë kërkuar Dukës shumën prej 100 mijë eurosh në kriptovaluta, duke përdorur emrin e Taulant Ballës për t’u paraqitur si persona të lidhur me të.
Biznesmeni dyshoi se bëhej fjalë për një mashtrim dhe kontaktoi menjëherë policinë. Gjatë komunikimit me autorët, Duka u ka thënë se nuk merrej me kriptovalutat dhe i ka orientuar ata të kontaktonin djalin e tij.
Në vijim, në komunikimin telefonik me dy të dyshuarit ka ndërhyrë një agjent policie i infiltruar, i cili është prezantuar si djali i biznesmenit. Agjenti u ka bërë të ditur se nuk dispononte paratë në formën e kriptovalutave, por se mund t’ua dorëzonte shumën në cash.
Dy të rinjtë kanë pranuar dhe kanë përcaktuar Elbasanin si vendin ku do të kryhej dorëzimi i parave. Në momentin e takimit, policia ka ndërhyrë dhe ka bërë arrestimin e tyre.
Gjatë operacionit, njëri prej të dyshuarve ka tentuar të largohet me vrap, por është ndaluar nga efektivët e policisë.
Pas kësaj skeme dyshohet se qëndron Florian Gjergji, i cili prej kohësh është shpallur në kërkim ndërkombëtar. Sipas të dhënave për hetimin, Gjergji dyshohet se e organizon aktivitetin në distancë, ndërsa për mbledhjen e parave përdor persona të tjerë, të cilët angazhohen si transportues kundrejt pagesave.
Skema që i atribuohet Gjergjit konsiston në përdorimin e identiteteve të personave të njohur publikë, veçanërisht të figurave politike, për t’u kërkuar shuma parash biznesmenëve apo personave të tjerë.
Hetimet vijojnë për të zbardhur të gjithë mekanizmin e skemës, si dhe për të përcaktuar nëse dy të arrestuarit kanë pasur edhe raste të tjera të ngjashme.
