Trashësia e dëborës në qarkun e Dibrës ka arritur deri në një metër, duke shkaktuar vështirësi të mëdha në lëvizje dhe jetesë. Reshjet janë ndalur mbrëmë, por temperaturat e ulëta kanë sjellë ngrica, me termometrin që ka shënuar -15°C në Bulqizë.
Në zonat si Lura, Selishta, Kalaja e Dodës, Sllova, Trebishti dhe Ostreni, 60% e fshatrave mbeten të bllokuar, duke ndikuar edhe në mbylljen e mësimit në shumicën e shkollave të qarkut.
Rruga nacionale Peshkopi-Bulqizë është e kalueshme me zinxhirë në disa segmente, ndërsa rruga e Arbrit është hapur gjatë mëngjesit. Pushteti vendor dhe firmat nënkontraktore vazhdojnë punën për hapjen e rrugëve dhe shpërndarjen e kripës për të parandaluar akullin.
