Eliminimi i Belgjikës nga Kupa e Botës ka sjellë pikëpyetje të mëdha për të ardhmen e dy prej emrave më të rëndësishëm të kombëtares: Kevin De Bruyne dhe Thibaut Courtois.
Pas humbjes 2-1 ndaj Spanjës, të dy veteranët nuk dhanë garanci se do të vazhdojnë me Belgjikën. De Bruyne pranoi se vitet e fundit kanë qenë shumë të vështira fizikisht, ndërsa Courtois tha se vendimi për të ardhmen e tij do të varet edhe nga bisedimet me federatën dhe trajnerin Rudi Garcia.
“Kam kaluar dy ose tre vite të vështira dhe kam bërë një operacion të madh. Jam 35 vjeç. Jam krenar që jam këtu, që jap gjithçka çdo ditë dhe që mund të jem shembull për këtë skuadër të re”, u shpreh De Bruyne.
I pyetur nëse kjo ishte ndeshja e tij e fundit me Belgjikën, mesfushori nuk e përjashtoi vazhdimin, por kërkoi kohë për të pushuar.
“Nuk mendoj kështu, por tani më lini të bëj pak pushim. Ka qenë një vit i ngarkuar, pastaj do të shohim”, tha ai.
Edhe Courtois, i cili u detyrua të linte fushën i dëmtuar ndaj Spanjës, foli hapur për një skenar të mundshëm largimi nga kombëtarja. Portieri i Real Madridit kërkon më shumë qetësi pas një sezoni të lodhshëm dhe nuk përjashtoi një pauzë nga Liga e Kombeve.
“Do të ishte mirë të bëja një vit pushim nga Nations League, që të mund të gjej pak qetësi. Më pas mund të jem në portë për kualifikueset e Europianit dhe për Europianin. Tani i takon trajnerit dhe federatës të marrin një vendim”, deklaroi Courtois.
Ai shtoi se do të diskutojë me Vincent Mannaert dhe trajnerin e kombëtares për të kuptuar nëse planet e tyre përputhen me dëshirën e tij.
“Nëse ata e shohin ndryshe nga unë, atëherë duhet të mendoj nëse mund të vazhdoj të jem pjesë e Belgjikës. Ndoshta kjo ishte ndeshja ime e fundit me kombëtaren”, tha portieri.
Belgjika tashmë përballet jo vetëm me dhimbjen e eliminimit, por edhe me mundësinë e mbylljes së një cikli të rëndësishëm. Vendimet e De Bruyne dhe Courtois pritet të jenë vendimtare për të ardhmen e kombëtares belge.
