Manchester United mori një fitore shumë të rëndësishme në transfertë ndaj Chelsea, teksa goli i Matheus Cunha në pjesën e parë rezultoi vendimtar në suksesin 1-0 në “Stamford Bridge”.
Kjo fitore forcon ndjeshëm shpresat e United për një rikthim në Champions League, ndërsa për Chelsea situata bëhet gjithnjë e më e vështirë. Blutë pësuan humbjen e katërt radhazi në Premier League dhe u përcollën me vërshëllima nga tifozët në fund të ndeshjes.
Skuadra vendase krijoi më shumë, mbajti më shumë topin dhe goditi tri herë shtyllën me Estevao Willian, Liam Delap dhe Wesley Fofana, por sërish nuk arriti të gjejë golin. Chelsea nuk shënon prej 4 marsit dhe kriza ofensivë po bëhet gjithnjë e më shqetësuese.
Nga ana tjetër, United tregoi më shumë pragmatizëm dhe goditi në momentin e duhur. Pas një topi të kthyer nga Bruno Fernandes, Cunha realizoi me goditjen e parë dhe vendosi fatin e takimit. Për Fernandes ishte asisti i 18-të në kampionat këtë sezon.
Te Chelsea, situata vazhdon të përkeqësohet. Skuadra ka humbur pesë nga gjashtë ndeshjet e fundit në kampionat, ndërsa sulmi po dështon totalisht në fazën më vendimtare të sezonit. Edhe protestat e tifozëve ndaj pronarëve shtuan më shumë tensionin në “Stamford Bridge”.
Në krahun tjetër, kjo ishte një fitore me shumë peshë për Michael Carrick, i cili pa skuadrën e tij të përgjigjej mirë pavarësisht mungesave në mbrojtje. Edhe një herë tjetër, Bruno Fernandes ishte lojtari që bëri diferencën me vizionin dhe ndikimin e tij në lojë.
