Komisioni i Apelit ka rrëzuar ankesën e Real Madridit dhe ka lënë në fuqi pezullimin me katër ndeshje për Vinicius Junior.
Sulmuesi brazilian ishte përjashtuar me karton të kuq ndaj Villarrealit pas tërheqjes së flokëve të Salibas, ndërsa më pas u ndëshkua edhe për protestat ndaj arbitrit.
Dy ndeshje pezullim janë dhënë për episodin me Saliban, pasi Komisioni ka vlerësuar se veprimi nuk ndodhi në një situatë ku lojtari po luftonte realisht për topin.
Dy ndeshjet e tjera lidhen me sjelljen e Vinicius pas përjashtimit. Apeli ka theksuar se fakti që arbitri nuk identifikoi fjalët e sakta të brazilianit nuk e zhvlerëson vendimin, pasi ai kishte konstatuar qëndrimin, gjestet dhe mënyrën e protestës.
Kjo do të thotë se Vinicius, nëse dënimi nuk ndryshon, do të mungojë ndaj Sevillas, Barcelonës, Racing Santander dhe Valencias.
Për rrjedhojë, braziliani nuk do të jetë në dispozicion të José Mourinhos as për El Clásicon ndaj Barcelonës më 25 tetor.
Real Madridi nuk ka ndërmend të ndalet këtu. Klubi do ta çojë çështjen në Gjykatën Administrative të Sportit, duke kërkuar heqjen ose reduktimin e dënimit, ose të paktën pezullimin e tij të përkohshëm deri në marrjen e një vendimi përfundimtar.
Nëse katër ndeshjet e pezullimit mbeten në fuqi, Vinicius mund të rikthehet në LaLiga vetëm pas pushimit të kombëtareve, në ndeshjen ndaj Celtës në fundjavën e 21-22 nëntorit.
