Cristiano Ronaldo ka konfirmuar se ky do të jetë Botërori i tij i fundit. Ylli portugez foli para ndeshjes së madhe ndaj Spanjës, në një konferencë për shtyp ku interesimi ishte maksimal.
Mbërritja e tij në Dallas shkaktoi një atmosferë të jashtëzakonshme rreth vendit ku po qëndron Portugalia. Tifozë të shumtë me fanellën me numrin 7 mbushën zonën, ndërsa vëmendja ishte e gjitha te kapiteni portugez, përpara një sfide që mund të jetë vendimtare për të ardhmen e Portugalisë në turne.
“Po e shijoj në maksimum atë që do të jetë Botërori im i fundit. Shpresoj që ndeshja e nesërme të mos jetë e fundit për mua”, u shpreh Cristiano, duke e thënë me humor, por edhe me shumë emocion.
Ronaldo theksoi se ndihet krenar sa herë përfaqëson Portugalinë dhe se çdo ndeshje me kombëtaren e përjeton sikur të ishte e para. Ai pranoi se ky Botëror ka një rëndësi të veçantë për të, sidomos për shkak të emocioneve të forta që skuadra ka përjetuar dhe homazhit për Diogo Jotan.
Kapiteni portugez foli edhe për presionin dhe kritikat, duke theksuar se nuk lejon që komentet e jashtme ta ndikojnë. Sipas tij, gjëja më e rëndësishme është të ruajë qetësinë, të shijojë futbollin dhe të japë gjithçka në fushë.
“Çfarëdo që të ndodhë, Cristiano do të largohet me ndërgjegjen 1000% të pastër. Luaj për pasion, sepse e dua futbollin. Nuk mund t’i vendos vetes presionin se në fund të karrierës jam i detyruar të fitoj Botërorin”, tha ai.
Ronaldo foli me respekt edhe për Spanjën, duke e cilësuar si një nga favoritet e mëdha. Ai pranoi se ka një lidhje të veçantë me këtë vend, por theksoi se Portugalia ka besim dhe se detajet mund të vendosin fatin e ndeshjes.
I pyetur për Lamine Yamal, Cristiano e vlerësoi talentin e ri spanjoll, duke thënë se ka një të ardhme shumë të ndritur, por shtoi se e sheh Spanjën si një skuadër të plotë dhe shumë të rrezikshme.
Në fund, Ronaldo përsëriti se dëshiron ta shijojë deri në fund këtë Botëror. Ndeshja ndaj Spanjës mund të jetë një tjetër kapitull historik në karrierën e tij, por edhe një nga sfidat më emocionale të rrugëtimit të fundit në Kupën e Botës.
