Cristiano Ronaldo ka fituar çmimin BOAT, një vlerësim i krijuar nga UEFA dhe France Football për të përcaktuar, përmes votimit të tifozëve, fituesin më të madh mes futbollistëve që kanë triumfuar të paktën dy herë në Topin e Artë.
Portugezi fitoi votimin për edicionin e tij të vitit 2008, kur mori Topin e Artë për herë të parë si lojtar i Manchester United.
Ronaldo la pas Lionel Messin, i cili u rendit i dyti me sezonin e tij të vitit 2012, ndërsa një tjetër fitore e portugezit, ajo e vitit 2017, u rendit në vendin e tretë.
Në vitin 2008, Cristiano kishte fituar Topin e Artë përpara Lionel Messit dhe Fernando Torresit. Më pas ai e ngriti trofeun edhe në vitet 2013, 2014, 2016 dhe 2017, duke e çuar numrin total të triumfeve në pesë.
Në votimin për BOAT u përfshinë vetëm futbollistët që e kishin fituar Topin e Artë të paktën dy herë, mes tyre Messi, Cristiano Ronaldo, Marco van Basten, Michel Platini, Johan Cruyff, Ronaldo Nazário, Franz Beckenbauer, Alfredo Di Stéfano dhe Karl-Heinz Rummenigge.
Votimi u zhvillua online në faqen e Topit të Artë dhe çdo votë kushtonte një euro. Mes pjesëmarrësve do të hidhen gjithashtu në short dy bileta për ceremoninë e Topit të Artë 2027.
Me këtë rezultat, Cristiano Ronaldo fitoi një tjetër duel simbolik ndaj Lionel Messit, këtë herë përmes votës së tifozëve.
