Një nga pamjet më të forta të Kupës së Botës 2026 erdhi në çerekfinalen mes Spanjës dhe Belgjikës, kur Thibaut Courtois u detyrua të largohej i dëmtuar nga fusha.
Portieri belg ndjeu shqetësime në kofshë në minutën e 65-të, në një moment kur Belgjika po rezistonte fort ndaj presionit të Spanjës. Courtois tentoi të vazhdonte lojën, por pak çaste më vonë u ul sërish në fushë dhe në minutën e 71-të u zëvendësua nga Lammens.
Largimi i tij nuk kaloi pa u vënë re. Gardiani i Real Madridit u pa shumë i prekur emocionalisht, duke mbuluar fytyrën me fanellë, ndërsa kamerat më pas e kapën në lot pranë shokëve të skuadrës.
Deri në atë moment, Courtois kishte qenë një nga arsyet pse Belgjika ishte ende në lojë. Ai kishte bërë disa pritje të rëndësishme, përfshirë një ndërhyrje fantastike ndaj goditjes së Lamine Yamal, që po shkonte drejt shtyllës.
Por dalja e tij ndryshoi gjithçka. Në minutën e 88-të, Cubarsí goditi fort nga jashtë zone, Lammens e priti topin në qendër dhe Mikel Merino përfitoi nga kthimi, duke shënuar golin e fitores 2-1 për Spanjën.
Merino, që kishte vendosur edhe ndeshjen ndaj Portugalisë, u kthye sërish në heroin e “La Rojas”. Goli i tij dërgoi Spanjën në gjysmëfinalet e Kupës së Botës, ndërsa për Belgjikën dëmtimi i Courtois mbetet momenti që i ndryshoi rrjedhën e ndeshjes.
