Pierluigi Collina, shefi i arbitrave në FIFA dhe një nga figurat më të mëdha në historinë e arbitrimit, ka folur për rolin e teknologjisë në Botërorin 2026, zgjedhjen e Slavko Vincic për finalen Spanjë-Argjentinë dhe polemikat që shoqëruan disa episode gjatë turneut.
Collina tregoi se njoftimi i arbitrit të finales mbetet gjithmonë një moment i veçantë. Këtë herë ishte Vincic ai që mori lajmin se do të drejtojë finalen e madhe.
“Sa herë më rrëqethet mishi. E di çfarë kanë bërë këta djem dhe vajza për vite me radhë, me shumë sakrifica, edhe për familjet e tyre. E prisja emocionin e Vincic, të njëjtin që kam përjetuar edhe unë”, u shpreh Collina.
Ai vlerësoi arbitrin slloven, duke thënë se zgjedhja nuk ishte e lehtë, por Vincic e meritonte finalen.
“Ka pasur një karrierë shumë të mirë. Jam i lumtur për të dhe për të tjerët që ishin këtu. Nuk ishte e thjeshtë të zgjidhej”, shtoi ai.
Collina u ndal edhe te risitë e këtij Botërori, mes tyre rregulli i tetë sekondave për portierët. Sipas tij, më parë portierët në disa kampionate e mbanin topin për më shumë se 20 sekonda, ndërsa arbitrat hezitonin të jepnin goditje indirekte në zonë, sepse dënimi dukej i tepruar. Me rregullin e ri, nëse portieri e kalon kohën e lejuar, jepet goditje këndi.
Por tema kryesore ishte teknologjia. Collina theksoi se futbolli nuk mund të pranonte më një paradoks të tillë: mijëra tifozë në stadium të shikonin përsëritjet në kohë reale, ndërsa arbitri, personi që duhej të merrte vendimin, të mos kishte të njëjtën mundësi.
“Ne investojmë miliona në teknologji, por shpresojmë që ajo të mos përdoret. Kjo do të thotë se arbitri ka marrë vendimin e duhur në fushë”, tha ai.
Shefi i arbitrave të FIFA-s foli edhe për episodin e famshëm të “Spider Cam” në ndeshjen Norvegji-Angli, ku pati dyshime se topi kishte prekur kabllot e kamerës.
“Është e pabesueshme që njerëzit nuk binden dot se topi nuk preku asnjë kabllo. Grafiku tregoi qartë se nga momenti kur portieri largoi topin deri te kontrolli i lojtarit tjetër nuk pati asnjë goditje apo kontakt. U pa vetëm një valë e lehtë, e lidhur me ajrin”, shpjegoi Collina.
Ai shtoi se të njëjtat mjete teknologjike ndihmuan edhe në episode të tjera, duke treguar saktë momentet kur topi prekte lojtarin apo një pjesë të trupit.
Për ata që mendojnë se teknologjia ia heq emocionin futbollit, Collina nuk është aspak dakord.
“S’është e vërtetë historikisht. Ka disa sekonda pritje për një pozicion jashtë loje, por lojtari feston kur shënon. Nëse goli konfirmohet, ka një festë të dytë. Nëse anulohet, feston skuadra kundërshtare”, u shpreh ai.
Sipas Collinës, emocioni është më i fortë kur bazohet mbi një vendim të drejtë, jo mbi një episod që mund të diskutohet për javë, vite apo dekada.
“Ende sot, pas 60 vitesh, flasim nëse topi e kaloi apo jo vijën në golin e Anglisë në finalen e vitit 1966”, përfundoi ai.
