Një postim i rremë në rrjetet sociale u kthye në shkëndijën e një debati të fortë mes Çiljeta Xhilagës dhe kantautorit Gjergj Leka.
Gjithçka nisi pasi në një faqe në rrjet u publikua pretendimi se këngëtarja ishte nderuar nga Presidenti i Republikës me titullin “Mjeshtre e Madhe e Punës”. Edhe pse lajmi rezultoi i pavërtetë, ai ngjalli reagime të shumta, mes tyre edhe atë të Gjergj Lekës. Kantautori e ironizoi publikimin, duke lënë të kuptohej se një vlerësim i tillë do të ishte i pamerituar. Komenti i tij nuk kaloi pa përgjigje nga Çiljeta, e cila sqaroi se nuk kishte marrë asnjë dekoratë dhe e kritikoi për reagimin e nxituar pa verifikuar faktet. Këngëtarja kujtoi rrugëtimin e saj artistik që prej vitit 2000 dhe theksoi se mbështetja e publikut ka qenë gjithmonë e pandryshuar. “Edhe sot, 41 vjeçe dhe me 10 kilogramë më shumë, vazhdoj t’i mbush koncertet,” u shpreh ajo. Pas reagimit të saj, Gjergj Leka sqaroi se komenti i tij nuk ishte personal, por lidhej me vlerësimin e kontributit artistik. Ai tha se e respekton Çiljetën si njeri, por ka një mendim ndryshe për ndikimin e saj në muzikën shqiptare, duke i uruar një karrierë të gjatë me sa më shumë krijime me vlerë.
Në fund, Çiljeta zgjodhi ta mbyllte polemikën, duke u shprehur se u zhgënjye nga fakti që një koleg me përvojë reagoi mbi bazën e një informacioni të pavërtetë. Ajo theksoi se nuk dëshiron ta zgjasë më tej debatin dhe se preferon t’ia lërë publikut gjykimin.
