Rič dhe Nensi Kinder, një nga çiftet më të fuqishme në Shtetet e Bashkuara, kanë njoftuar se do të dhurojnë 95% të pasurisë së tyre, gati 9 miliardë euro, për qëllime bamirësie, “për të lënë pas një botë më të mirë”, siç kanë deklaruar vetë ata.
Shuma do të menaxhohet përmes Kinder Foundation, një fondacion me seli në Hjuston që mbështet projekte në fushat e arsimit, kërkimeve mjekësore dhe mbrojtjes së mjedisit.
Deri më tani, fondacioni ka dhuruar mbi 700 milionë euro për ndërtimin e parqeve, spitaleve dhe hapësirave publike, ndër to, më i njohuri është Memorial Park, projekti më i madh i gjelbër në qytet.
Në një intervistë për kanalin ABC13, Nensi Kinder u shpreh:
“Duam që nipërit dhe mbesat tona të ndihen krenarë për ne dhe të kuptojnë se kanë edhe ata përgjegjësi për të kontribuar.”
Ndërsa bashkëshorti i saj, Rič Kinder, bashkëthemelues i kompanisë energjetike Kinder Morgan, shtoi:
“Dëshirojmë të lëmë botën pak më të mirë nga sa e gjetëm.”
Çifti është pjesë e Giving Pledge, nismës së Bill Gates dhe Warren Buffett, e cila fton miliarderët e botës të dhurojnë të paktën gjysmën e pasurisë së tyre për qëllime bamirësie.
Megjithatë, ekspertët paralajmërojnë se pasuritë e miliarderëve po rriten më shpejt se sa dhurimet e tyre, ndaj kërkohet një qasje më e qëndrueshme dhe e thelluar ndaj filantropisë.
Për momentin, çifti nga Hjustoni duket i vendosur për të bërë ndryshim. Siç tha Nensi Kinder:
“Nuk mund ta ndryshojmë botën vetëm, por mund ta bëjmë pak më të drejtë.”
