Chelsea ka shkarkuar Liam Rosenior vetëm pesë muaj pas emërimit të tij në krye të skuadrës. Humbja e rëndë 3-0 ndaj Brighton u kthye në pikën e fundit për klubin londinez, pas një serie shumë të dobët rezultatesh në Premier League.
Në një deklaratë zyrtare të publikuar të mërkurën, Chelsea njoftoi ndarjen me trajnerin anglez. Klubi falënderoi Rosenior dhe stafin e tij për punën e bërë gjatë periudhës së tyre në Stamford Bridge, duke theksuar profesionalizmin dhe integritetin që ai tregoi që nga momenti i emërimit në mes të sezonit.
Megjithatë, drejtuesit e klubit pranuan se ky vendim nuk është marrë lehtë, por rezultatet dhe paraqitjet e fundit kanë qenë nën standardet e kërkuara, në një moment kur sezoni ka ende objektiva të rëndësishëm për t’u arritur. Chelsea mbetet në garë për një vend në Europë dhe për të avancuar në FA Cup.
Për pjesën e mbetur të sezonit, skuadra do të drejtohet nga Calum McFarlane si trajner i përkohshëm, i mbështetur nga pjesa tjetër e stafit teknik. Ndërkohë, klubi ka bërë të ditur se do të nisë një proces reflektimi për të gjetur zgjidhjen e duhur afatgjatë për pankinën.
Rosenior, 41 vjeç, largohet pas një ecurie historikisht negative, me pesë humbje radhazi në kampionat, një krizë që vulosi fundin e aventurës së tij te Chelsea.
