Kylian Mbappé ka folur hapur për nofkën “diktator”, apo “Mobutu”, që prej vitesh përdoret ndaj tij në rrjetet sociale dhe, në disa raste, edhe nga tifozët kundërshtarë.
Në një intervistë për “L’Équipe”, ylli i Real Madridit pranoi se e kupton që shpesh përdoret me humor, por theksoi se krahasime të tilla mund të kalojnë kufirin.
“Ka edhe një anë më pak argëtuese, sepse e dimë dëmin që njerëz të tillë kanë shkaktuar gjatë historisë. Të krahasohesh me persona që kanë vrarë apo kanë bërë miliona njerëz të vuajnë…”, deklaroi Mbappé.
Francezi shtoi se nuk mendon se ka bërë ndonjëherë diçka që justifikon një etiketim të tillë. “E di që shpesh bëhet pa ndonjë qëllim të keq, por ndonjëherë tregon mungesë ndërgjegjësimi politik dhe njerëzor.”
Mbappé bëri gjithashtu një dallim për rastin e Ousmane Dembélés, duke shpjeguar se kur nofka përdoret mes tyre, qëllimi është vetëm humori dhe jo dëmtimi i figurës së tij.
