Seanca plenare e së enjtes në Kuvend u shoqërua me debate të forta mes deputetëve të opozitës dhe anëtarëve të qeverisë, kryesisht gjatë interpelancave të zhvilluara në sallë.
Situata u tensionua kur deputeti demokrat Luçiano Boçi mori fjalën dhe qëndroi në foltore për disa minuta duke refuzuar të largohej, pavarësisht ndërhyrjeve të Gardës dhe paralajmërimeve nga drejtuesi i Kuvendit, Niko Peleshi.
Pas këtyre zhvillimeve, Boçi u përjashtua nga seanca plenare.
Menjëherë pas këtij incidenti, opozita vendosi të braktisë sallën gjatë votimit të projektligjeve.
Sakaq, në mungesë të deputetëve opozitarë, mazhoranca miratoi me 76 vota pro dhe asnjë kundër projektligjin për krijimin e Agjencisë së Arsimit.
Më herët, ministrja e Arsimit Mirela Kumbaro hodhi poshtë pretendimet e opozitës lidhur me projektligjin për Agjencinë e Shërbimeve Arsimore, duke deklaruar se ai ka marrë miratimin e Komisionit Evropian.
Sipas saj, ky institucion ka dhënë dakordësinë për nismën ligjore.
Kumbaro u shpreh gjithashtu se miratimi i këtij ligji përmbyll detyrimet për Kapitullin 26 të negociatave me Bashkimin Evropian, të dedikuar arsimit, duke e cilësuar atë si kapitullin e parë që mbyllet në kuadër të procesit të integrimit.
Ndërkohë, Kuvendi miratoi gjithashtu me 77 vota pro në tërësi projektligjin “Për disa shtesa dhe ndryshime në ligjin nr. 33, datë 31.03.2021, ‘Për Gardën e Republikës së Shqipërisë’, i ndryshuar”.
Me këto ndryshime ligjore, mazhoranca synon të rikthejë formulën e mëparshme të emërimit të drejtuesve të Gardës së Republikës, duke hequr dorë nga procesi i konkurrimit dhe duke parashikuar emërim të drejtpërdrejtë nga Kryeministri, me propozim të ministrit të Brendshëm.
