Mbrëmja e së martës në Champions League pritet të jetë vendimtare, teksa dy prej katër skuadrave gjysmëfinaliste do të përcaktohen pas sfidave të kthimit: Borussia Dortmund – Barcelona dhe Aston Villa – Paris Saint-Germain. Ndeshjet luhen paralelisht nga ora 21:00 dhe premtojnë spektakël dhe emocione të forta.
Barcelona kërkon të mbyllë punën në Dortmund
Katalanasit e Hansi Flick kanë një avantazh komod nga ndeshja e parë, të cilën e fituan me rezultatin e thellë 4-0 përballë Borussia Dortmund. Megjithatë, trajneri gjerman i Barcelonës ka bërë thirrje për përqendrim maksimal dhe përulësi përpara sfidës në “Signal Iduna Park”.
“Mund të ëndërrojmë, por duhet të qëndrojmë me këmbë në tokë. Dëshirojmë të mbetemi të pamposhtur në këtë sezon. Dortmund është një kundërshtar shumë i fortë dhe duhet të japim maksimumin. Pavarësisht fitores 4-0 në ndeshjen e parë, duhet të jemi të përqendruar dhe të ruajmë stilin tonë të lojës”, u shpreh Flick.
PSG synon të mbyllë llogaritë në “Villa Park”
Në përballjen tjetër, Paris Saint-Germain ka fituar 3-1 në ndeshjen e parë ndaj Aston Villës, por asgjë nuk është e sigurt për trajnerin Luis Enrique, i cili e konsideron ndeshjen e kthimit si një tjetër finale për skuadrën e tij.
“Objektivi është ta fitojmë ndeshjen. Në një stadium si ‘Villa Park’ duhet të jesh në maksimumin e kapaciteteve. Do të shërbejë si motivim për ne. Nuk ka favoritë. Të njëjtën gjë thonin edhe për Liverpool-in, por ja ku jemi”, deklaroi tekniku spanjoll.
Të dyja skuadrat janë favoritë pas rezultateve të para, por Champions League ka dëshmuar ndër vite se përmbysjet janë të mundshme dhe emocionet të garantuara deri në sekondat e fundit. Sytë e Europës do të jenë sonte nga Dortmundi dhe Birminghami, ku pritet të zbulohen dy emrat e parë që do të vazhdojnë garën drejt finales së madhe.
