“Nuk dua të flas me askënd. Mendoj vazhdimisht, po vuaj psikologjikisht”, janë fjalët prekëse të Viswashkumar Ramesh, i mbijetuari i vetëm i aksidentit ajror të Air India, ku humbën jetën 241 persona më 12 qershor 2025, në një tragjedi që tronditi botën mbarë.
Ramesh, 39 vjeç, arriti të shpëtojë duke u larguar në këmbë nga rrënojat e përflakura të fluturimit Ahmedabad–Londër. Ai e përshkroi shpëtimin e tij si një “mrekulli”, por humbi gjithçka — përfshirë edhe vëllain e tij të vogël, Ajay, i cili ndodhej disa rreshta më larg në avion.
Që kur u kthye në shtëpinë e tij në Leicester, Angli, ai vuan nga çrregullimi i stresit post-traumatik (PTSD) dhe, sipas mjekëve, nuk ka mundur të komunikojë normalisht as me bashkëshorten, as me djalin e tij katërvjeçar. Ramesh nuk ka marrë ende asnjë ndihmë mjekësore apo psikologjike pas kthimit në Britani.
“Jam i vetmi i mbijetuar. Ende nuk mund ta besoj. Është një mrekulli”, tha ai në intervistën e parë për BBC. “Humba vëllain tim, shtyllën time kurrizore. Ishte gjithmonë pranë meje. Tani jam vetëm. Rri i mbyllur në dhomë, nuk flas as me gruan e as me fëmijën tim. Dua vetëm të jem vetëm.”
Ramesh rrëfen se çdo ditë është një torturë për të dhe familjen e tij, sidomos për nënën që ndodhet në gjendje të rëndë emocionale:
“Nëna ime rri çdo ditë ulur te dera pa folur me askënd. Edhe unë nuk dua të flas me njeri. Mendoj gjithë kohën. Vuaj shpirtërisht. Çdo ditë është e dhimbshme për ne.”
Ai ndodhej në vendin 11A, pranë daljes së emergjencës, prej nga arriti të dilte jashtë avionit në flakë. Ka pësuar dëmtime në këmbë, shpatull, gju dhe bel, dhe nuk është në gjendje të punojë apo të drejtojë makinën. Edhe për lëvizjet më të vogla, ka nevojë për ndihmën e bashkëshortes.
Tragjedia
Avioni Boeing 787 Dreamliner mori flakë pak sekonda pas ngritjes nga aeroporti i Ahmedabad, në Indinë perëndimore, më 12 qershor 2025. Pamjet dramatike tregonin Ramesh duke u larguar vetëm nga rrënojat, ndërsa pas tij ngriheshin shtëllunga tymi.
Në spitalin e Indisë, ai tregoi se si shpëtoi duke zhbërë rripin e sigurimit dhe duke u zvarritur jashtë trupit të shkatërruar të avionit. Pak orë më vonë, u vizitua nga kryeministri indian Narendra Modi, i cili ngushëlloi të plagosurit dhe familjet e viktimave.
Sipas raportit paraprak të Agjencisë Indiane për Hetimin e Aksidenteve Ajrore (AAIB), i publikuar në korrik, furnizimi me karburant të motorëve u ndërpre vetëm disa sekonda pas ngritjes. Hetimet vazhdojnë, ndërsa Air India deklaroi se “kujdesi për z. Ramesh dhe familjet e viktimave mbetet përparësi absolute”.
Nga viktimat, 169 ishin shtetas indianë, 52 britanikë, dhe 19 persona humbën jetën në tokë.
