Iker Casillas ka shtuar një tjetër temë të fortë në krizën që po kalon Real Madrid. Ish-kapiteni madrilen ka deklaruar se do ta rikthente Xabi Alonso në stolin e skuadrës, duke e cilësuar atë si trajnerin ideal për klubin.
“Do ta firmosja përsëri Xabi Alonso. Për mua, ai ishte trajneri perfekt”, u shpreh Casillas gjatë një eventi të Movistar në Barcelona, ku u prezantua mbulimi televiziv i El Clásico.
Deklarata e tij tërhoqi vëmendje, sidomos në një moment kur emri i José Mourinho po përmendet si një mundësi për rikthim te Real Madrid. Casillas nuk deshi të zgjatej shumë për portugezin, me të cilin pati një periudhë të vështirë në të kaluarën.
“Më pyesni për Mourinho dhe nuk më intereson. Kam kaluar një moment të vështirë me të, por ajo histori ka përfunduar”, tha ish-portieri.
Në event ishte i pranishëm edhe Carles Puyol, me të cilin Casillas foli për situatën e tensionuar në dhomën e zhveshjes së Real Madrid. Të dy u përpoqën ta normalizonin situatën, duke theksuar se përplasjet ndodhin shpesh brenda një skuadre.
“Kam pasur debate të mëdha, edhe me miq shumë të mirë. Në një dhomë zhveshjeje ndodh gjithçka”, tha Puyol, duke kujtuar se edhe te Barcelona ka përjetuar momente të ngjashme.
Casillas, nga ana tjetër, u shpreh se Real Madrid do të dijë të ngrihet përsëri, pavarësisht krizës aktuale.
“Gjithçka është ciklike. Tani gjërat nuk po na ecin, por Real Madrid është klubi më i madh në histori. Është gjithmonë në qendër të vëmendjes dhe do të rikthehet. Çdo gjë ka zgjidhje”, deklaroi ai.
Puyol foli edhe për vështirësinë e të fituarit pas sukseseve të mëdha, duke theksuar se egot mund të bëhen problem nëse skuadra nuk menaxhohet siç duhet.
Kur u pyetën për El Clásico, Puyol kërkoi përqendrim nga lojtarët e Barcelona, duke thënë se ata nuk duhet të ndikohen nga lajmet që vijnë nga kampi madrilen. Casillas, ndërkohë, foli për krenarinë e Real Madrid.
“Nëse Barcelona fiton, Real Madrid do ta urojë. Por nëse do të isha lojtar i Real Madrid, objektivi im do të ishte të paktën të mos i lejoja ta festonin titullin kundër nesh”, tha Casillas.
Në fund, mes gjithë debateve për të ardhmen e stolit madrilen, mesazhi i Casillas ishte i qartë: ai beson ende te Xabi Alonso dhe do t’i jepte një tjetër mundësi në krye të Real Madrid.
