Në një intervistë për “Gazzetta dello Sport”, Fabio Capello foli për derbin e ardhshëm të Kupës së Italisë mes Interit dhe Milanit.
A pret ndonjë surprizë?
Teorikisht, është e vështirë ta besosh, sidomos pasi pashë pjesën e parë të Interit kundër Udineses dhe pjesën e parë të Milanit ndaj Napolit. Nëse të dyja skuadrat do të përsërisnin ato 45 minuta që pamë dje, më duket e vështirë të mendoj se do të ketë një ndeshje të ekuilibruar. Por, si gjithmonë, derbit janë sfida më vete. Edhe në tri përballjet e fundit me zikaltrit, Milani u fut në fushë në momente të vështira dhe si skuadra jo favorite.
A është kjo ndeshje është më e rëndësishme për Milanin sesa për Interin?
Ashtu është. Interi është ende në garë në tri fronte, me Champions League dhe titullin e Serie A si objektivat kryesorë. Ndërsa kampionati i Milanit praktikisht përfundoi pas humbjes ndaj Napolit. Për Conceiçao dhe skuadrën e tij, ndoshta Kupa e Italisë është e vetmja rrugë e mbetur për të siguruar një vend në Europë. Të mos e shohim Milanin në një kompeticion ndërkombëtar sezonin e ardhshëm do të ishte goditje e madhe.
Një mendim për paraqitjen pozitive të Leaos kundër Napolit?
Padyshim, Leao ka diçka më shumë se të tjerët, por gjithmonë i mungon vazhdimësia. Megjithatë, po ta kishte vazhdimësinë pozitive, ndoshta nuk do të ishte më te ky Milan…
