Është caktuar masa e sigurisë “arrest me burg” për 68-vjeçarin Hysni Patushi i cili në gjendje të dehur i mori jetën gruas së tij, Lumturie Patushit, ngjarje e ndodhur ditën e shtunë në zonën Zogu i Zi, në Tiranë.
Në seancën e sotme gjyqësore të mbajtur në Gjykatën e Tiranës mësohet se togat e zeza vulosën masën e sigurisë “arrest me burg” për Hysni Patushin, i cili thuhet se aktualisht është i shtruar në QSUT, pasi ka probleme me zemrën.
Siç kemi raportuar dhe ditën e djeshme, ka qenë nipi i çiftit në fjalë ai që ka ngritur në këmbë efektivët e Tiranës të cilët janë nisur me shpejtësi në vendngjarje. “Alo, Policia, gjyshja ka vdekur!” ka qenë telefonata që ka mbërritur në sallën operative të Policisë së Tiranës, çka bëri që efektivët të nisen me shpejtësi në zonën e Zogut të Zi.
Personi që njoftoi policinë për ngjarjen e tmerrshme që pa me sytë e tij së bashku me vëllain 8 vjeç, mësohet se ka qenë nipi 14-vjeçar i çiftit, ngjarja mes të cilëve dje shokoi mbarë opinionin publik. “Në shtëpi erdhi gjyshi. Ai filloi të grindej me gjyshen dhe më pas e goditi me thikë”, mësohet të ketë deklaruar para togave të zeza nipi 14-vjeçar i dyshes.
Me të mbërritur në vendngjarje, efektivët kanë gjetur të mbuluar nga gjaku 58-vjeçaren Lumturie Patushin, e cila qëllua për vdekje me thikë nga bashkëshorti i saj Hysni, i cili dyshohet se nën efektin e alkoolit, pas një debati të ashpër me të e ka goditur pa mëshirë, duke i marrë jetën në vend.
Ngjarja e rëndë ndodhi në prezencën e nipërve të dyshes, të cilët pasi kanë përjetuar debatin e ashpër të gjyshërve të tyre, kanë parë me sy vrasjen e gjyshes. P asi qëlloi për vdekje me thikë gruan e tij, mësohet se Hysni Patushi tentoi të humbte gjurmët duke u zhdukur nga vendngjarja. Për pak minuta ai u zhvendos nga shtëpia e vajzës së tij, në zonën e Zogut të Zi, në drejtim të Kamzës, ku tentoi të fshihej te një i afërm i tij.
Mirëpo ky i fundit e nxori zbuluar pasi njoftoi menjëherë Policinë, e cila u nis me shpejtësi drejt Kamzës ku dhe u vendos në pranga 68-vjeçari Hysni Patushi. Edhe pse Patushi aktualisht po merr mjekim në QSUT pasi mësohet se ka probleme me zemrën, gjyqtarët e Tiranës caktuan ditën e sotme “arrest me burg” për burrin që vrau gruan e tij për motive të dobëta, ngjarje e cila ka tronditur mbarë Shqipërinë.
