“Fathom dëgjon dhe monitoron çdo kërcënim nënujës në kohë reale,” shpjegon Katie Raine, drejtoreshë e programit në kompaninë “Helsing”, që bashkëpunoi në ndërtimin e dronit.
Plani përfshin gjithashtu anije pa ekuipazh, helikopterë eksperimentalë dhe dronë gjigantë nëndetës, si “Excalibur”, 12 metra i gjatë dhe me peshë 19 tonë. Këto mjete do të shërbejnë për të mbrojtur kabllot nënujore, gazsjellësit dhe rrjetet energjetike, që konsiderohen pjesë jetike e sigurisë kombëtare britanike.
Sipas autoriteteve, aktivitetet ruse janë shtuar me 30% në dy vitet e fundit, ndërsa nëndetëset e Moskës akuzohen për tentativa hartimi të rrjeteve nënujore britanike. Komiteti i Sigurisë Kombëtare paralajmëron se çdo sulm ndaj tyre mund të shkaktojë dëmtime katastrofike në sistemet financiare dhe të komunikimit të vendit.
Admirali Sir Gwyn Jenkins paralajmëroi se epërsia britanike në Atlantik po ngushtohet, teksa Rusia vazhdon të investojë masivisht në flotën e saj nënujore. Nga ana tjetër, Moska e ka cilësuar reagimin britanik si “histerik” dhe pjesë të një strategjie për të rritur tensionet brenda NATO-s.
