Mijëra abonentë të kompanisë celulare “One Albania” janë përballur mbrëmjen e kaluar dhe gjatë ditës së sotme me shkëputje të internetit dhe të telefonatave, pasi janë shkëputur valët.
Sipas raportimeve, për më shumë se një orë, shërbimi i telefonatave dhe i internetit nuk ka qenë në funksion, duke lënë shumë përdorues pa mundësi komunikimi. Defekti vazhdon të jetë ende prezent te disa përdorues.
Ende nuk dihet se çfarë e ka shkaktuar këtë problem, por qytetarët kanë denoncuar mungesën e shërbimit që paguajnë te kompania “One”.
Nga ana tjetër, vetë “One Albania”, me një papërgjegjshmëri totale nuk ka reaguar për ndërprerjen e shërbimit ndaj klientëve dhe nuk ka dhënë asnjë njoftim zyrtar.
Kujtojmë se kjo nuk është hera e parë që abonentët e kompanisë celulare “One Albania” përballen me shkëputje të shërbimit, pasi raste të ngjashme janë regjistruar edhe më parë.
