Teksa afati i regjistrimit të koalicioneve për zgjedhjet e 11 Majit po shkon drejt skadimit, janë zbardhur detaje të reja nga negociata e kryedemokratit Sali Berisha me aleatët.
Edhe pse gjatë konferencës për mediat, ai u tregua hermetike, duke mos zbuluar asgjë publikisht, burime për mediat bëjnë me dije se është arritur marrëveshja dhe me Partinë e Lirisë për të qenë pjesë e koalicionit.
Mësohet se fillimisht, Ilir Meta i ka kërkuar Berishës 6-7 kandidatë për deputetë në lista të mbyllura, por më pas është arritur marrëveshja me vetëm 4 kandidatë në listat e sigurta.
Më konkretisht, Ilir Meta, edhe pse në qeli, do të jetë në listën e sigurt të PD-së në Tiranë, Tedi Blushi do të jetë në listën e sigurtë në Korçë, Edmond Haxhinasto në Elbasan dhe Erisa Xhixho në Fier. Gjithashtu, është dakordësuar edhe që disa kandidatë të tjerë të Partisë së Lirisë të jenë në listat e hapura.
Vangjel Dule i PBDNJ-së duket se ka arritur marrëveshjen me Berishën që emrin e tij ta vendosë në listën e sigurtë të Qarkut të Vlorës, ndërsa Fatmir Mediu, ashtu si edhe në zgjedhjet e kaluar do të jetë në listën e sigurtë në Tiranë.
Po ashtu, është arritur marrëveshja edhe me Agron Dukën e Partisë Agrare, i cili edhe pse vetë ka vendosur të largohet nga parlamenti, një kandidat i tij, do të jetë në listën e sigurtë të Qarkut të Durrësit.
Burime për mediat bëjnë me dije se Berisha është në negociata edhe me Shpëtim Idrizin e PDIU-së, ku ky i fundit duket se e ka hequr “vijën e kuqe” se nuk do të pranonte të ishte në të njëjtin koalicion me Vangjel Dulen.
Mësohet se deri në këtë fazë të negociatave, Berisha i ka ofruar Idrizit vetëm një vend në listat e siguerta të kandidatëve për deputet, por kreu i PDIU-së ka kërkuar dy deputetët.
Ndërkohë, ende nuk dihet nëse do të ketë një vend të sigurt në listë për Nard Ndokën e Demokristianëve apo jo.
3 marsi është dita e fundit kur partitë duhet të depozitojnë në KQZ listën e tyre të koalicioneve.
