Ish-kryeministri Sali Berisha deklaroi ditën e sotme se Partia Demokratike është e vendosur t’i rikthejë qytetarëve shqiptarë paratë që u përkasin.
Ai denoncoi gjendjen ekonomike dhe shpërdorimin e trashëgimisë kulturore të Tiranës, ndërsa theksoi angazhimin për një sistem më të drejtë ekonomik dhe shoqëror.
“Tirana, armikun më të egër e ka pasur betonin,” tha Berisha.
“Është jashtëzakonisht e dhimbshme. Zonat që i shpallën të mbrojtura, si Pazari i Vjetër – një kryevepër që s’e ka as Parisi karshi katedrales – u shkatërruan nga etja për beton. Dy arkitektë të rinj kishin bërë një projekt të bukur me ndihmën e zviceranëve, por askush nuk i dëgjoi.”
Berisha theksoi se do të angazhohet për ruajtjen e trashëgimisë kulturore.
“Tirana nuk lindi nga betoni. Betoni erdhi më vonë dhe po e shkatërron më shumë se çdo gjë tjetër.”
Duke iu rikthyer çështjes së pensioneve dhe të drejtave ekonomike të qytetarëve, ai u ndal te krahasimet me vendet e rajonit.
“Në vitin 2013, pensioni mesatar në Shqipëri ishte 143 mijë lekë. Sot, në Mal të Zi është 450 mijë, në Maqedoni 390 mijë, në Serbi 405 mijë, dhe edhe Kosova e ka më të lartë se ne.”
“Sot, për të blerë ato që blije në 2013-ën me 143 mijë lekë, duhet të kesh pension 390 mijë lekë. Por qeveria jep vetëm 16 milionë euro për 760 mijë pensionistë. Është turp.”
Ai shtoi se Partia Demokratike ka propozuar ligjin për një pension minimal prej 200 eurosh.
“Ne kishim dërguar ligjin prej një viti e gjysmë për 200 euro pension minimal. Jo, thanë, kjo na çon në humnerë. Por nuk është e vërtetë – kjo e bën shoqërinë më të drejtë.”
“Ne do t’ua kthejmë qytetarëve paratë që u takojnë. Nuk do të ketë shqiptar që të marrë nën 200 euro. Të gjitha pensionet nën 200 mijë lekë do të rriten me 20%.”
Po ashtu, ai njoftoi se do të aplikohet Karta e Konsumatorit, që do t’u kthejë qytetarëve 20% të shpenzimeve për ushqimet bazë.
“Kjo është një masë që aplikohet në shumë vende. Do të ndikojë ndjeshëm në përmirësimin e jetesës.”
