Në një mesazh urimi me rastin e Pashkëve, ish-kryeministri Sali Berisha ka vlerësuar ringritjen e besimit fetar në Shqipëri, duke e krahasuar me ringjalljen e Krishtit.
Gjatë një takimi me Kryepeshkopin e Kishës Ortodokse Autoqefale të Shqipërisë, Fortlumturinë e Tij Joan, Berisha shprehu mirënjohje për punën dhe përkushtimin në vazhdim të veprës së Imzot Janullatos.
Ai tha se përpjekjet për të fshirë fenë në të kaluarën nuk ia dolën, pasi komuniteti fetar u ringrit nga hiri dhe sot gëzon mbështetje të gjerë.
Në të njëjtën frymë, Berisha theksoi edhe forcën e pluralizmit shqiptar, i cili, sipas tij, ka kaluar prova të mëdha dhe mbetet një themel i fortë për shpresën dhe të ardhmen e vendit.
Berisha: Punën e madhe të çmuar që bëni në vazhdim të veprës së pavdekshme të Imzot Janullatos, i cili punoi me një përkushtim të jashtëzakonshëm dhe ngriti nga rrënojat. Historia e Krishtit Mbret, është ripërsëritur në Shqipëri, sepse edhe këtu u mendua që ta rrafshonin fenë dhe besimin fetar, por ju u ngritët nga hiri, e ngritët dhe sot është perfomancë të shkëlqyer, me një mbështetje të gjerë të besimtarëve, me të gjitha institucionet.
Në Shqipëri, përpoqën ta fshijnë dhe pluralizmin, por morën dhe do të marrin atë që meritojnë. Sot pluralizmi është i fortë, kaloi prova të mëdha dhe kam besim të madh që shpresa, optimizmi dhe e ardhmja do të jenë ajo që meritojnë dhe do kenë shqiptarët.
