E ardhmja e José Mourinho te Benfica po bëhet gjithnjë e më e pasigurt, ndërsa emri i tij po lidhet fort me një rikthim të mundshëm te Real Madrid.
Klubi madrilen është në kërkim të trajnerit për sezonin e ardhshëm, pasi qëndrimi i Álvaro Arbeloa nuk shihet si zgjidhje afatgjatë. Mes emrave të përmendur, Mourinho po fiton gjithnjë e më shumë peshë brenda klubit.
Sipas AS, te Real Madrid portugezi konsiderohet si një nga kandidatët më të përshtatshëm për të udhëhequr ndryshimin që kërkohet në dhomën e zhveshjes. Drejtuesit madrilenë besojnë se skuadra ka nevojë për një figurë të fortë, me autoritet dhe eksperiencë.
Nga ana tjetër, Benfica është e vetëdijshme për interesimin rreth trajnerit të saj dhe dëshiron ta mbajë edhe për të paktën një sezon tjetër. Presidenti Rui Costa ka tentuar të zgjasë kontratën me Mourinho, por deri tani bisedimet nuk kanë dhënë rezultatin e dëshiruar.
Në Lisbonë po rritet bindja se e ardhmja e Benfica mund të mos jetë më e lidhur me Mourinho, diçka që vetëm pak javë më parë dukej e pamundur.
Kontrata aktuale e trajnerit portugez mund të zgjidhet përmes pagesës së një klauzole prej 3 milionë eurosh, një skenar që do t’i hapte rrugën një rikthimi të mundshëm të tij në “Santiago Bernabéu”.
