Presionet politike ndaj sistemit të drejtësisë në Shqipëri duket të ndalen.
Këtë mesazh dha Ambasadori i Bashkimit Europian në Shqipëri, Silvio Gonzato në një intervistë për Deutsche Velle, teksa theksoi se reforma në drejtësi është një nga arritjet më të larta të vendit.
“Ne kemi thënë se, në të vërtetë, gjyqësori dhe sistemi gjyqësor janë bërë më të qëndrueshëm ndaj këtyre sulmeve, edhe sepse është një sistem i pavarur. Por, megjithatë, mendojmë se këto sulme nga politikanët dhe ndërhyrja politike janë diçka që e shohim me shqetësim. Është diçka që nuk duhet të vazhdojë”, tha Gonzato.
Kryediplomati i unionit në Tiranë komentoi dhe çështjen e fondeve të IPARD-it, ku shpjegoi se vendi ynë nuk i ka dhënë ende siguri BE-së në mënyrë që të marrin paratë.
“Ne nuk mund ta bëjmë këtë nëse nuk kemi gjithë garancitë e mjaftueshme se paratë po menaxhohen siç duhet, dhe presim që qeveria shqiptare ta marrë seriozisht këtë. Pra, topi tani është ende në fushën e qeverisë shqiptare për ta vlerësuar këtë raport auditimi dhe për ta siguruar Brukselin se masat që kanë marrë janë të mjaftueshme që ne të rifillojmë ndihmën, ndihmën financiare në kuadër të IPARD-it”, shtoi Gonzato.
Puna e bërë për përshtatjen e legjislacionit shqiptar me atë të Bashkimit Europian për Gonzaton është e mirë, ama nuk duhet të shkelet transparenca.
“Në këtë kontekst, është gjithashtu e rëndësishme të nënvizohet një gjë, sepse po punojmë nën presion të madh, por mendoj se është e rëndësishme që të mos e bëjmë këtë në dëm të transparencës, përfshirjes, që miratimi i ligjeve dhe masave të bazohet në një debat të hapur, ku njerëzit të kuptojnë çfarë po bëhet”, deklaroi Gonzato.
Ambasadori i BE, komentoi dhe vizitën e anëtarëve të komisionit për punët e jashtme të parlamentit europian në Tiranë . Për Gonzaton eurodeputetët dhanë mesazhe të qarta për punën që duhet të ndjekë parlamenti ynë.
