Kryetari i Partisë Demokratike, Sali Berisha gjatë një konference me gazetarët ka komentuar kontratën e lobimit të Partisë Demokratike me një kompani amerikane me vlerë 6 milionë dollarë me një kohëzgjatje prej 24 muajsh. Berisha tha se kjo kontratë është 100% sipas ligjit dhe nuk ka lidhje me zgjedhjet.
Berisha: Kjo kontratë nuk as asnjë lidhje me zgjedhjet. Ka një qëllim tjetër. Marrëdhëniet e Shqipërisë me SHBA-në, paraqitjen e realitetit shqiptar me të gjitha problematikat e mëdha të tij para administratës së SHBA. Nuk mund të ndodhë më që pa u mbyllur kutia e fundit Edi Rama urohet për fitoren.
Ne besojmë se bashkëpunimi i Edi Ramës me bandat është rrezik jo vetëm për Shqipërinë, rajonin dhe Evropën por edhe SHBA. Çështja me McGonigal është një varr i hapur dhe duhet të mbyllet. Së katërti, përparësi për ne janë marrëdhëniet me SHBA në të gjitha aspektet dhe nuk mund të mohojmë se u vu shumë barrë mbi PD, ndaj dhe ne kemi marrë një avokat, ndër më të shquarit të asaj toke, i cili ka për detyrë avokatinë e kauzave të drejta të PD pranë administratës Trump.
Ka një nen, 21 i ligjit të partive politike, nen që autorizon partitë të marrin ndihma, mbështetje financiare nga forca të tjera politike, organizata ndërkombëtare partiake politike dhe fondacione. Pra kontrata është 100% e bazuar në ligj. Populli opozitar nuk është një popull jetim. Kontrata mbahet sipas kërkesave të palëve, objektivave të palëve. Një gjë është e sigurt, PD nuk ka më një kauz jetime. Kjo kontratë ka synim mbrojtjen e kauzave të popullit opozitar.
