Barcelona ka shkruar historinë në La Liga, pas fitores së vështirë ndaj Osasuna, me rezultatin 2-1, në javën e 34-të të kampionatit.
Skuadra katalanase, nën drejtimin e Hansi Flick, ka treguar një nivel të jashtëzakonshëm qëndrueshmërie gjatë gjithë sezonit. Sipas “Barça Universal”, Barcelona është bërë klubi i parë në histori që arrin 29 fitore në 34 ndeshjet e para të La Liga.
Triumfi në Pamplona ishte një hap shumë i rëndësishëm drejt titullit kampion, pasi katalanasit tashmë janë vetëm një fitore larg sigurimit matematikor të kampionatit para kohe.
Fitorja ndaj Osasuna nuk erdhi lehtë, por Barcelona tregoi karakter dhe forcë mentale, duke marrë tre pikë me peshë të madhe në garën për titull.
Ky rekord konfirmon sezonin fantastik të skuadrës së Hansi Flick, që po dominon kampionatin spanjoll dhe po lë gjurmë në historinë e futbollit.
