Talenti i ri mund të transferohet në Angli.
Barcelona ka marrë një vendim të vështirë që mund të trazojë tregun europian në merkaton e ardhshme.
Sipas Mundo Deportivo, klubi katalanas është i hapur zyrtarisht të dëgjojë oferta për mbrojtësin e majtë Alejandro Balde. Edhe pse 22-vjeçari spanjoll konsiderohej deri vonë si një lojtar “i paprekshëm” dhe pjesë e së ardhmes së mbrojtjes blaugrana, situata e vështirë financiare po e detyron drejtuesit të shqyrtojnë shitjen e disa prej talenteve më të rëndësishëm të skuadrës.
Dy klubet më të interesuara për Balde janë Manchester United dhe Manchester City. “Djajtë e Kuq” janë në kërkim të një zëvendësuesi afatgjatë për Luke Shaw, i cili është penalizuar shpesh nga dëmtimet, ndërsa Pep Guardiola e sheh Balde si profilin ideal për krahun e majtë, falë aftësisë së tij për të mbuluar të gjithë flankun dhe për t’u përshtatur me kërkesat taktike të ekipit.
Përveç dy gjigantëve të Manchesterit, në garë ka hyrë edhe Aston Villa. Klubi nga Birminghami, nën drejtimin e Unai Emery, po vazhdon projektin ambicioz për forcimin e skuadrës në prag të sezonit të ardhshëm në Champions League.
Sezonin aktual, Balde ka zhvilluar 34 ndeshje dhe ka dhënë 3 asiste. Sipas Transfermarkt, vlera e tij në treg është rreth 55 milionë euro.
