Barcelona ka marrë një lajm të mirë në garën për të mbajtur Joao Cancelo. Al Hilal raportohet se ka zbutur kërkesat financiare për mbrojtësin portugez, duke hapur rrugën për një marrëveshje më të përballueshme.
Klubi saudit fillimisht kërkonte rreth 15 milionë euro për kartonin e lojtarit, por sipas Mundo Deportivo, tani është i gatshëm ta ulë këtë shifër pas bisedimeve të vazhdueshme mes palëve.
Cancelo e ka bërë të qartë se nuk dëshiron të rikthehet në Arabinë Saudite dhe prioriteti i tij është të vazhdojë te Barcelona. Portugezi ndihet mirë në Katalonjë dhe shihet si një lojtar i rëndësishëm në planet e Hansi Flick.
Raportet me Al Hilal nuk janë më të mirat, ndërsa vetë lojtari ka folur për pakënaqësitë e tij gjatë periudhës në klubin saudit. Edhe marrëdhënia me trajnerin Simone Inzaghi përshkruhet si e ftohtë, duke e bërë rikthimin në Riyadh shumë të vështirë.
Cancelo vjen pas një sezoni historik me Barcelonën, ku ndihmoi skuadrën të fitonte titullin e 29-të në La Liga. Me këtë sukses, ai u bë futbollisti i parë që fiton kampionate në katër nga pesë ligat kryesore të Evropës: Premier League, Serie A, Bundesliga dhe La Liga.
Ndërkohë, Jorge Mendes po punon edhe për disa çështje të tjera te Barcelona, përfshirë të ardhmen e Marc Casadó dhe alternativa të mundshme në sulm. Por për momentin, Cancelo mbetet një nga prioritetet e katalanasve në merkato.
