Ish-presidenti i Shqipërisë, Bamir Topi, ka komentuar me tone të ashpra debatet e ndezura në rrjetet sociale pas incidentit në “Big Brother VIP”, ku konkurrenti Jozi goditi Gjestin. Gjatë një interviste në Top News, Topi u shpreh se reagimi i fortë publik nuk është thjesht një valë spontane komentesh, por sipas tij, një fushatë e organizuar që mund të ketë prapavijë edhe ndikime nga shërbime sekrete të huaja.
“Nuk dua të hyj në diskutimin mbi nivelin kulturor të shoqërisë, veçanërisht të brezit të ri. Edhe në portalet online, duket sikur ka shumë njerëz që reagojnë, por në fakt janë pak, dhe shpesh pas profileve që duken të shumta, fshihen individë me emra të çuditshëm dhe që duken si profesionistë të kësaj pune,” – tha ai.
Topi shtoi se sipas tij, shoqëria shqiptare është në një gjendje të rënduar dhe se shtresa e mesme nuk do të kontribuonte në thellimin e përçarjeve, duke lënë të nënkuptohet se reagimet janë të nxitura nga grupe të caktuara.
“Janë falanga që paguhen për këtë punë. Janë pjesë e shërbimeve sekrete. Sot, lufta bëhet përmes inteligjencës. Fatkeqësisht, kemi edhe shqiptarë që marrin pjesë në këto operacione, duke folur shqip dhe duke ndikuar negativisht në opinionin publik,” deklaroi Topi.
Sipas tij, shumë nga profilet që përhapin urrejtje dhe përçarje në rrjetet sociale nuk përfaqësojnë përdorues të vërtetë, por janë identitete të fabrikuara, të krijuara me qëllim për të manipuluar publikun dhe për të krijuar ndasi mes shqiptarëve.
