Ish-ministri i Brendshëm, Taulant Balla, ka reaguar pas akuzave të opozitës për kaos në shpërndarjen e fletëve të votimit për diasporën. Në një deklaratë të gjatë, Balla i cilëson këto reagime si “klithma të përfaqësuesve të këneta-s”, që sipas tij, kanë nisur të ndërtojnë alibinë për një humbje të paralajmëruar në zgjedhjet e 11 majit.
“Na paskan ‘zbuluar’ një skandal të madh, se gjoja fletët e votimit janë hedhur rrugëve. Në fakt, alibia ka ditë që përgatitet me konferenca për shtyp, ndërsa sot shpërtheu me fotografi zarfe-sh në Facebook,” shkruan ai.
Sipas Ballës, procesi i shpërndarjes është realizuar nga KQZ në bashkëpunim me kompaninë ndërkombëtare DHL, pjesë e Deutsche Post. Ai thekson se shteti shqiptar ka paguar për shpërndarjen e fletëve të votimit në shtëpitë e qytetarëve që jetojnë jashtë dhe për rikthimin e tyre. Megjithatë, për shkak të disa vështirësive, një pjesë e votuesve janë detyruar t’i tërheqin personalisht zarfat në zyrat postare.
“Afro 10% e votuesve nuk e kanë marrë ende fletën e votimit, por procesi është ende në zhvillim dhe zgjat deri të premten (10 maj), të paktën nga Greqia,” nënvizon ai.
Në fund, Balla iu drejtua qytetarëve të diasporës me një thirrje të qartë:
“Ju lutem nxitoni dhe bëni gjithçka për ta dërguar votën tuaj për një Shqipëri Europiane. Është koha ta thajmë përfundimisht kënetën, me gjithë bufat, bretkosat dhe gjarpërinjtë që ka brenda.”
