Babai dhe njëkohësisht agjenti i Alexis Mac Allister ka mohuar zërat për negociata me Liverpoolin për rinovimin e kontratës së mesfushorit argjentinas.
Në një deklaratë për Win Win, Carlos Mac Allister u shpreh qartë se aktualisht nuk ka asnjë bisedim në zhvillim me klubin anglez për një marrëveshje të re. “Nuk ka negociata me Liverpoolin për rinovimin e kontratës”, deklaroi ai.
Që prej transferimit nga Brighton, Mac Allister është kthyer në një nga figurat kryesore të mesfushës së Liverpoolit. Argjentinasi ka rritur ndjeshëm nivelin e paraqitjeve të tij dhe tashmë konsiderohet pjesë shumë e rëndësishme e skuadrës, sidomos në repartin ku aktivizohet krah Gravenberch dhe Szoboszlai.
Megjithatë, pavarësisht rolit të tij të rëndësishëm te “The Reds”, emri i tij vazhdon të lidhet me klube të mëdha evropiane. Së fundmi, mesfushori është përfolur edhe si një objektiv i mundshëm i Real Madridit për përforcimin e mesfushës.
Mac Allister ka kontratë me Liverpoolin deri në vitin 2028. Babai i lojtarit theksoi gjithashtu se 27-vjeçari ndihet i lumtur dhe rehat në klubin anglez, ndërsa mbetet për t’u parë nëse Liverpool do të bëjë një lëvizje konkrete për t’i zgjatur edhe më shumë qëndrimin në “Anfield”.
