Khvicha Kvaratskhelia nuk ka ndërmend të largohet nga Paris Saint-Germain këtë verë, pavarësisht interesimit të raportuar nga Arsenal.
Sulmuesi anësor gjeorgjian mbetet plotësisht i përkushtuar ndaj projektit të PSG, teksa kampionët francezë synojnë të vazhdojnë sukseset në Evropë.
Arsenal është lidhur prej kohësh me Kvaratskhelia, pasi Mikel Arteta kërkon të përforcojë repartin ofensiv në merkaton e verës. Megjithatë, një transferim i mundshëm në Londër duket i komplikuar, pasi PSG e konsideron 25-vjeçarin si një lojtar shumë të rëndësishëm për skuadrën.
Babai i lojtarit, Badri Kvaratskhelia, ka hedhur poshtë zërat për një largim të mundshëm.
“Khvicha të largohet nga PSG? Ai nuk po mendon për këtë. Është i lumtur në Paris, ku vlerësohet dhe respektohet shumë nga klubi. Pse duhet të mendojë për një transferim tjetër kur po fiton trofe me skuadrën dhe është një nga lojtarët kryesorë të PSG? Nëse PSG nuk dëshiron më të vazhdojë bashkëpunimin, atëherë do të shqyrtojmë opsione, por për momentin kjo nuk po diskutohet”, u shpreh ai.
Kvaratskhelia ka justifikuar investimin e madh të PSG që prej transferimit nga Napoli në janar të vitit 2025 për rreth 80 milionë euro. Ai është kthyer shpejt në një nga titullarët kryesorë të skuadrës, duke regjistruar 24 gola dhe 17 asistime në 74 paraqitje.
Për momentin, largimi i tij nga “Parc des Princes” duket i pamundur, përveçse nëse ndodh një ndryshim strategjik brenda klubit. Gjeorgjiani është i fokusuar te PSG dhe te objektivi për të fituar sërish trofe të mëdhenj.
Zërat për interesimin e Arsenal mund të vazhdojnë, por Kvaratskhelia duket i vendosur të mbetet pjesë e projektit të PSG edhe për të ardhmen e afërt.
