Një qytetar, Halit Mucalla, babai i dy kampionëve të mundjes, ka reaguar në rrjetet sociale duke shprehur pakënaqësi për mungesën e mbështetjes ndaj sportistëve të rinj në Shqipëri, duke adresuar kritika ndaj institucioneve shtetërore dhe federatave sportive.
Ai prezanton në postimin e tij dy djemtë e tij, të cilët sipas tij kanë arritur rezultate në mundje në kategoritë e moshave të reja. “Joeli është kampion i Shqipërisë i mundjes U12”, shkruan ai, duke shtuar se ka fituar medalje edhe në aktivitete të tjera gjatë viteve të fundit.
Ndërkohë, për djalin tjetër, ai thotë se “Eno ka qenë nënkampion i Shqipërisë për U9 dhe sot ka dalë kampion Shqipërie U9”, ndërsa pretendon gjithashtu një sukses ndërkombëtar: “Eno doli kampion i Evropës në Paris”.
Mucalla shprehet kritik ndaj mungesës së mbështetjes financiare për sportistët e rinj, duke deklaruar se shpenzimet i ka mbuluar vetë. “Kam harxhuar 500€ që e kam çuar në Paris çunin e vogël, kam blerë biletat vetë, gjithë transporti”, thotë ai në reagimin e tij.
Ai kritikon gjithashtu institucionet, duke thënë se nuk ka mbështetje të mjaftueshme për fëmijët në sport: “Ministria e Sportit nuk është se fëmijëve po i jep një drejtim, një të ardhme më të mirë”.
Në përfundim të reagimit të tij, ai shpreh pakënaqësi për mungesën e vëmendjes gjatë aktiviteteve sportive, duke shtuar: “Na lanë fëmijët pa bukë… turp”, ndërsa kërkon më shumë mbështetje simbolike dhe institucionale për sportistët e rinj
