Atentati ndaj çiftit Kreshnik dhe Gentjana Mujeci, i ndodhur mesditën e 26 prillit, ka tronditur mbarë komunitetin. Dy bashkëshortët u ekzekutuan me breshëri plumbash pasditen e së dielës në rrugën Balldren-Torovicë, teksa ata po udhëtonin me automjet.
Ndërkohë, Besnik Kolndreu një nga personat e shpallur në kërkim ka reaguar ditën e sotme për News24, duke mohuar çdo lidhje me ngjarjen. Ai deklaron se as ai dhe as familja e tij nuk kanë asnjë përfshirje në atentat, ndërsa shpreh shqetësimin se mund të përfshihet padrejtësisht në konflikt gjaku.
Reagimi i tij vjen pasi në banesën e tij është gjetur një nga automjetet që dyshohet se është përdorur nga autorët për atentat. Megjithatë, 40-vjeçari pretendon se në momentin e ngjarjes ka qenë duke udhëtuar drejt Malit të Zi, ku jeton dhe punon prej disa vitesh së bashku me familjen.
“Mua po më shkatërrohet e gjithë familja.. e ardhmja e fëmijëve të mi. Puna ime dhe i gjithë mundi i gjithë këtyre viteve, plus duan të më futin në gjak me një familje me të cilët kurrë nuk kemi patur problemin më të vogël. Prandaj i lutem shtetit që çështjen tonë ta shikojnë me imtësi dhe profesionalitet sepse këtu nuk është vetëm shteti dhe burgu ku duan të më futin pa patur asnjë faj, por dhe gjaku, dhe ne nuk duam të biem në gjak me askënd pa na pasur borxh dhe pa ju pasur borxh”, thuhet në reagimin e tij.
Gjithashtu ai është shprehur se familja e tij nuk kanë pasur dijeni për ngjarjen dhe për atentatin, të cilën e kanë mësuar përmes rrjeteve sociale.
“Familjarisht nuk kemi pasur dijeni që personat do të vinin në shtëpinë tonë. Që familjarisht asnjë pjesëtar i familjes tonë nuk ka qenë pjesëtar i grupit në vrasjen e çiftit Mujeci. Unë me nusen dhe fëmijët kam qenë rrugës për në Mal të Zi sepse këtu punoj dhe jetoj prej 6 vitesh kur nusja ime duke parë në TikTok më tha: o Zot çfarë paska ndodhur… paskan vrarë çiftin Mujeci dhe aty kam mësuar për vrasjen. Tani dua t’u them diçka… jam 40 vjeç.. kam punuar 25 vite që në të 40-at të arrij të bëj një firmë ndërtimi.. që ata që më njohin e dinë mirë me çfarë mundimi. Si mundet dikush në këtë situatë si unë të shkatërrojë familjen, biznesin, veten, fëmijët, të bie dhe në gjak për një fis tjetër që nuk janë as Kolndreaj as xhaxhallarë, as vëllezër, as kushërinjtë e mi”, tha ai.
