Atlético Madrid ka reaguar me ironi ndaj zërave të merkatos që e lidhin Julián Álvarez me Barcelonën, duke publikuar një postim thumbues në rrjetet sociale.
Klubi madrilen ka bërë shaka duke “ofruar” katër bileta për koncertin e Bad Bunny, një abonim njëvjeçar në ABC dhe një qese fara luledielli për Barcelonën. Më pas, Atlético shtoi me ironi se pret përgjigjen e katalanasve për të përgatitur prezantimin.
Thumbimi nuk u ndal vetëm te Álvarez. Atlético përdori inteligjencën artificiale për të veshur me fanellën kuqebardhë lojtarë të Barcelonës si Lamine Yamal, Pedri dhe Raphinha, duke ironizuar lajmet e shumta që kanë qarkulluar ditët e fundit.
Nga klubi madrilen janë shprehur të lodhur nga ato që i cilësojnë “muaj të tërë me gënjeshtra, gjysmë të vërteta dhe lajme të sajuara”, duke përfshirë edhe raportimet për interesimin e Barcelonës ndaj Julián Álvarez.
Atlético e mbylli reagimin me një mesazh të qartë për tifozët: “Mos besoni gjithçka që shihni, sidomos nëse lidhet me Barcelonën”.
