Atlético Madrid ka reaguar ashpër ndaj situatës së krijuar rreth Julián Álvarez, duke e bërë të qartë se nuk ka ndërmend të negociojë me Barcelonën për sulmuesin argjentinas.
Sipas burimeve të klubit të cituara nga Marca, mundësia që Julián të transferohet te Barça është praktikisht zero.
“Ka 0% mundësi që ta shesim te Barcelona. Kjo nuk është më çështje parash, por dinjiteti”, është qëndrimi që vjen nga drejtuesit e Atlético-s.
Klubi madrilen pretendon se është dëmtuar ekonomikisht dhe në imazh nga e gjithë situata, duke akuzuar gjithashtu palët e përfshira se kanë krijuar “një fushatë me gënjeshtra dhe gjysmë të vërteta”.
Barcelona kishte paraqitur një ofertë prej 100 milionë eurosh, por Atlético nuk ka ndryshuar qëndrim. Më herët, klubi kishte vendosur si kusht një ofertë prej 150 milionë eurosh deri më 20 qershor, por një propozim i tillë nuk mbërriti.
Atlético pritet gjithashtu të përditësojë ankesën e bërë më parë, duke përfshirë zhvillimet e fundit dhe veprimet e Barcelonës dhe agjentit të lojtarit, Fernando Hidalgo.
Pavarësisht tensioneve, klubi ka bërë të qartë se do ta mbështesë Julián në aspektin shëndetësor, pasi argjentinasi mungoi në stërvitjen e fundit për shkak se nuk ndihej mirë.
