Arsenali vazhdoi formën e shkëlqyer në Premier League duke mposhtur bindshëm Tottenhamin 4–1 në derbin e zjarrtë të Londrës, një ndeshje ku “Topçinjtë” treguan superioritet të plotë nga fillimi deri në fund.
Leandro Trossard zhbllokoi rezultatin në minutën e 36’, pas një aksioni të kombinuar me Merinon, ndërsa vetëm pesë minuta më vonë Eberechi Eze dyfishoi avantazhin pas asistit të Declan Rice (41’).
Pjesa e dytë nisi me një tjetër goditje për Spurs: Eze realizoi dopietën e tij në minutën e 46’, duke e çuar rezultatin në 3–0. Tottenham tentoi të rikthehej me golin e Richarlison në minutën e 55’, por gëzimi i tyre zgjati pak.
Arsenali mbylli llogaritë në minutën e 76’, kur Eze kompletoi tripletën e tij pas një asistimi të Trossard-it, duke vulosur një fitore të madhe 4–1 në derbin e kryeqytetit.
Tottenhami përfundoi ndeshjen mes nervozizmit dhe kartonëve të panevojshëm, si ai i Cristian Romero dhe Porro, që reflektuan frustrimin e ekipit.
Ndërkohë, Arsenali konfirmoi formën dhe ambiciet e tij, duke marrë një fitore madhështore që e mban plot besim në luftën për titull.
